leftcenterrightdel
ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ແລະພັນລະຍາ ທີ່ສະໜາມບິນສະກົນ Haneda, ໂຕກຽວ. ສຳນັກຂ່າວສານຫວຽດນາມ

ນັກຂ່າວ: ເນື່ອງໃນໂອກາດກອງປະຊຸມສຸດຍອດການຮ່ວມມືແມ່ນ້ຳຂອງ-ຍີ່ປຸ່ນ ຄັ້ງທີ 10 ຈະໄດ້ຈັດຕັ້ງຢູ່ ຍີ່ປຸ່ນ, ທ່ານຕີລາຄາກ່ຽວກັບບົດບາດຂອງຍີ່ປຸ່ນ ໃນເລື່ອງຊຸກຍູ້ການຮ່ວມມື ແລະພັດທະນາໃນພາກພື້ນແມ່ນ້ຳຂອງໃນໄລຍະຜ່ານມາເປັນຄືແນວໃດ?

ທ່ານນາຍົກລັດຖະມົນຕີ ຫງວຽນຊວນຟຸກ: ໃນຊຸມປີຜ່ານມາ, ດ້ວຍບັນດາຄວາມມານະພະຍາຍາມຊຸກຍູ້ການປະຕິຮູບເສດຖະກິດພາຍໃນປະເທດ ແລະການເຊື່ອມໂຍງເຂົ້າກັບສາກົນ, ບັນດາປະເທດແມ່ນ້ຳຂອງບັນລຸໄດ້ຜົນງານສຳຄັນຫຼາຍຢ່າງກ່ຽວກັບການພັດທະນາເສດຖະກິດ-ສັງຄົມ ແລະກາຍເປັນໜຶ່ງໃນບັນດາພາກພື້ນມີລະດັບເຕີບໂຕເສດຖະກິດສູງແຖວໜ້າໃນໂລກ. ໃນວິວັດການນີ້, ການໜູນຊ່ວຍຂອງບັນດາຄູ່ຮ່ວມມືພັດທະນາ, ໃນນັ້ນມີ ຍີ່ປຸ່ນ, ມີຄວາມໝາຍສຳຄັນທີ່ສຸດ.

ການຮ່ວມມືລະຫວ່າງຍີ່ປຸ່ນ ກັບພາກພື້ນແມ່ນ້ຳຂອງໄດ້ຜັນຂະຫຍາຍຜ່ານບັນດາກົນໄກສອງຝ່າຍກໍ່ຄືບັນດາຂອບເຂດການຮ່ວມມືຫຼາຍຝ່າຍໃນຫຼາຍຂົງເຂດນັບແຕ່ການເມືອງ, ການຕ່າງປະເທດ, ເສດຖະກິດ, ການຄ້າ, ການສຶກສາ, ສິ່ງແວດລ້ອມ, ການທ່ອງທ່ຽວ. ຍີ່ປຸ່ນ ແມ່ນໜຶ່ງໃນບັນດາຄູ່ຮ່ວມມືການຄ້າ, ການລົງທຶນ, ແລະສະໜອງ ODA ແຖວໜ້າໃຫ້ບັນດາປະເທດແມ່ນໍ້າຂອງ.

ນັກຂ່າວ: ໃນໄລຍະຈະມາເຖິງ, ທ່ານນາຍົກລັດຖະມົນຕີ ປາດຖະໜາຢາກ ຍີ່ປຸ່ນຮ່ວມມືກັບບັນດາປະເທດອະນຸພາກພື້ນແມ່ນ້ຳຂອງຄືແນວໃດເພື່ອແນໃສ່ຊຸກຍູ້ການເຕີບໂຕຢູ່ອະນຸພາກພື້ນແມ່ນ້ຳຂອງ, ກໍ່ຄືຄວາມສະໜິດຕິດພັນ ແລະໜູນຊ່ວຍເຊິ່ງກັນ ແລະກັນລະຫວ່າງບັນດາພື້ນຖານເສດຖະກິດສະມາຊິກ?

ທ່ານນາຍົກລັດຖະມົນຕີ ຫງວຽນຊວນຟຸກ: ຄວາມສາມາດບົ່ມຊ້ອນໃນການຮ່ວມມືລະຫວ່າງຍີ່ປຸ່ນ ແລະບັນດາປະເທດແມ່ນ້ຳຂອງແມ່ນໃຫຍ່ຫຼວງທີ່ສຸດ ແລະຍັງມີຫຼາຍຂົງເຂດອາດຈະຊຸກຍູ້ໃຫ້ຫຼາຍກວ່າອີກເພື່ອຄວາມວັດທະນາຖາວອນ ແລະພັດທະນາແບບຍືນຍົງຂອງພາກພື້ນ. ບົນພື້ນຖານບັນດາຜົນງານທີ່ບັນລຸໄດ້, ພວກຂ້າພະເຈົ້າປາດຖະປາດຖະໜາຢາກໃຫ້ ຍີ່ປຸ່ນ ສືບຕໍ່ເສີມຂະຫບາຍບົດບາດແມ່ນຄູ່ຮ່ວມມືກວ່າອີກເພື່ອ “ພັດທະນາຄຸນນະພາບສູງ” ຢູ່ພາກພື້ນແມ່ນໍ້າຂອງ, ເສີມຂະຫຍາຍທ່າແຮງຂອງຍີ່ປຸ່ນ ກ່ຽວກັບເຕັກໂນໂລຢີ, ການເງິນກັບພາກພື້ນແມ່ນໍ້າຂອງກ່ຽວກັບລະດັບການເຕີບໂຕ, ຕະຫຼາດ ແລະແຮງງານ.

ນັກຂ່າວ: ຂໍທ່ານໃຫ້ຮູ້ການຕີລາຄາກ່ຽວກັບສາຍພົວພັນຫວຽດນາມ-ຍີ່ປຸ່ນ ແລະສິ່ງໃດແມ່ນຈຸດພົ້ນເດັ່ນໃນການພົວພັນສອງປະເທດ? ທ່ານມີຄວາມຫວັງຢາກໃຫ້ສາຍພົວພັນຫວຽດນາມ-ຍີ່ປຸ່ນ ພັດທະນາຄືແນວໃດໃນໄລຍະຈະມາເຖິງ ?

ທ່ານນາຍົກລັດຖະມົນຕີ ຫງວຽນຊວນຟຸກ: ປີນີ້, ຫວຽດນາມ ແລະຍີ່ປຸ່ນ ຈັດຕັ້ງພິທີສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ. ສອງຊາດຫວຽດນາມ  ແລະຍີ່ປຸ່ນ ໄດ້ແບ່ງປັນຫຼາຍຈຸດຄ້າຍຄືກັນກ່ຽວກັບປະຫວັດສາດ, ວັດທະນະທຳ, ມູນເຊື້ອ ແລະມີສາຍພົວພັນພິເສດທີ່ສຸດ. ປະຈຸບັນ, ພາຍຫຼັງ 45 ປີແຫ່ງວັນສ້າງຕັ້ງການພົວພັນທາງການທູດ, ສອງປະເທດໄດ້ກາຍເປັນຄູ່ຮ່ວມມືສຳຄັນທີ່ສຸດຂອງກັນ, ຮ່ວມກັນແບ່ງປັນບັນດາຜົນປະໂຫຍດຍຸດທະສາດລວມ. ຂອບເຂດການພົວພັນໄດ້ຮັບການຍົກລະດັບ ແລະກາຍເປັນຄູ່ຮ່ວມມືຍຸດທະສາດເລິກເຊິ່ງກວ້າງຂວາງເພື່ອສັນຕິພາບ ແລະວັດທະນາຖາວອນຂອງ ອາຊີ ( ປີ 2014), ຕອບສະໜອງຄວາມມຸ່ງມາດປາດຖາໜາ, ນຳມາເຊິ່ງຜົນປະໂຫຍດແທດຈິງໃຫ້ປະຊາຊົນສອງປະເທດ. ການພົວພັນຮ່ວມມືລະຫວ່າງສອງປະເທດໄດ້ພັດທະນາຢ່າງແຮງໃນທຸກຂົງເຂດ, ພົ້ນເດັ່ນແມ່ນ:

ຄວາມໄວ້ເນື້ອເຊື່ອໃຈດ້ານການເມືອງລະຫວ່າງສອງປະເທດນັບມື້ນັບໄດ້ຮັບການເພີ່ມທະວີ, ໃນນ້ັນ, ການພົບປະແລກປ່ຽນ, ການພົບປະລະຫວ່າງການນຳທຸກຂັ້ນ, ພິເສດແມ່ນຂັ້ນສູງໄດ້ດຳເນີນເປັນປະຈຳ.

ຍີ່ປຸ່ນແມ່ນຄູ່ຮ່ວມມືເສດຖະກິດສຳຄັນແຖວໜ້າຂອງຫວຽດນາມ, ລະອຽດແມ່ນປະເທດສະໜອງ ODA ໃຫຍ່ທີ່ສຸດ, ແມ່ນຄູ່ຮ່ວມມືການຄ້າສອງຝ່າຍໃຫຍ່ທີ 4 ຂອງຫວຽດນາມ. ປີ 2017 ຍີ່ປຸ່ນກາຍເປັນນັກລົງທຶນຕ່າງປະເທດຢືນອັນດັບທີ 1 ຢູ່ ຫວຽດນາມດ້ວຍຍອດເງິນລົງທຶນກວ່າ 9,1 ຕື້ໂດລາສະຫະລັດ, ທົບ 4 ເທົ່າເມື່ອທຽບໃສ່ກັບປີ 2016.

ການຮ່ວມມືໃນບັນດາຂົງເຂດປ້ອງກັນຊາດ, ປ້ອງກັນຄວາມສະຫງົບ, ວັດທະນະທຳ, ການສຶກສາ-ກໍ່ສ້າງ, ການທ່ອງທ່ຽວ, ການພົບປະແລກປ່ຽນປະຊາຊົນໄດ້ຮັບການປັບປຸງ ແລະເປີດກວ້າງຢ່າງບໍ່ຢຸດຢັ້ງ.

ສອງຝ່າຍກໍ່ຮ່ວມມືກັນຢູ່ບັນດາເວທີປາໄສສາກົນ ແລະພາກພື້ນຢ່າງແໜ້ນແຟ້ນ ແລະມີປະສິດທິຜົນ, ຄື: ສະຫະປະຊາຊາດ, ບັນດາກອງປະຊຸມ ASEAN+, APEC, ASEM... ສອງປະເທດໄດ້ສົມທົບກັນຢ່າງແໜ້ນແຟ້ນໃນເລື່ອງຊຸກຍູ້ການເຈລະຈາ, ລົງນາມໃນສັນຍາຄູ່ຮ່ວມມືຮອບດ້ານ ແລະກ້າວໜ້າຂ້າມປາຊີຟິກ (CPTPP), ການເຈລະຈາສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP); ສະໜັບສະໜູນເຊິ່ງກັນ ແລະກັນເປັນສະມາຊິກບໍ່ປະຈຳການຂອງສະພາຄວາມໝັ້ນຄົງ ສະຫະປະຊາຊາດ; ສົມທົບກັນໃນບັນດາຂົງເຂດພາກພື້ນ ແລະສາກົນເຊິ່ງຕ່າງຝ່າຍຕ່າງມີຄວາມສົນໃຈ, ປະກອບສ່ວນເຂົ້າການກໍ່ສ້າງພາກພື້ນອາຊີ-ປາຊີຟິກແຫ່ງສັນຕິພາບ, ສະຖຽນລະພາບ, ພັດທະນາ ແລະອີງໃສ່ກົດໝາຍສາກົນ.

ໃນໄລຍະຈະມາເຖິງ, ດ້ວຍຄວາມມານະພະຍາຍາມ, ເປັນຈິດໜຶ່ງໃຈດຽວກັນ ແລະນະໂຍບາຍຖືກຕ້ອງຂອງທັງສອງຝ່າຍນັ້ນ, ຂ້າພະເຈົ້າເຊື່ອໝັ້ນວ່າ, ການພົວພັນຄູ່ຮ່ວມມືຍຸດທະສາດເລິກເຊິ່ງກວ້າງຂວາງເພື່ອສັນຕິພາບ ແລະວັດທະນາຖາວອນຢູ່ອາຊີ ລະຫວ່າງຫວຽດນາມ ແລະຍີ່ປຸ່ນ ຈະກ້າວເຂົ້າສູ່ໄລຍະພັດທະນາໃໝ່, ນັບມື້ນັບມີປະສິດທິຜົນ, ມີຄວາມໝັ້ນຄົງ ແລະເລິກເຊິ່ງກວ້າງຂວາງກວ່າ.

ນັກຂ່າວ: ສະພາບເສດຖະກິດຄືໃນປະຈຸບັນ, ຂົງເຂດອຸດສາຫະກຳໃດເຊິ່ງຫວຽດນາມມີຄວາມປາດຖະໜາຢາກໃຫ້ບັນດາວິສາຫະກິດຍີ່ປຸ່ນ ໜູນຊ່ວຍ ແລະລົງທຶນ. ຂໍທ່ານນາຍົກລັດຖະມົນຕີໃຫ້ຮູ້ກ່ຽວກັບສານຂອງຫວຽດນາມ ຢາກສົ່ງເຖິງລັດຖະບານ, ວິສາຫະກິດ ແລະປະຊາຊົນຍີ່ປຸ່ນ?

ທ່ານນາຍົກລັດຖະມົນຕີ ຫງວຽນຊວນຟຸກ: ໃນໄລຍະຈະມາເຖິງ, ລັດຖະບານຫວຽດນາມ ຢັ້ງຢືນວ່າ     ຈະສືບຕໍ່ປ່ຽນແປງໃໝ່ຮອບດ້ານ, ຍູ້ແຮງການເຊື່ອມໂຍງເຂົ້າກັບສາກົນ, ຍົກສູງສະມັດຕະພາບ, ຄຸນນະພາບ, ປະສິດທິຜົນ ແລະກຳລັງແກ່ງແຍ້ງເພື່ອພັດທະນາໄວ ແລະຍືນຍົງ. ສ້າງເງື່ອນໄຂສະດວກເພື່ອໃຫ້ວິສາຫະກິດຕ່າງປະເທດເວົ້າລວມ ແລະວິສາຫະກິດຍີ່ປຸ່ນເວົ້າສະເພາະປະສົບຜົນສຳເລັດໃນການເຄື່ອນໄຫວດຳເນີນທຸລະກິດຢູ່ຫວຽດນາມ.

ເພື່ອຂຸດຄົ້ນຄວາມສາມາດບົ່ມຊ້ອນ, ທ່າແຮງຂອງກັນຢ່າງມີປະສິດທິຜົນກວ່າອີກ, ພວກຂ້າພະເຈົ້າຊົມເຊີຍວິສາຫະກິດຍີ່ປຸ່ນ ທີ່ໜູນຊ່ວຍ ແລະລົງທຶນເຂົ້າບັນດາຂົງເຂດເຊິ່ງຍີ່ປຸ່ນ ມີທ່າແຮງ ຄື: ເຕັກໂນໂລຢີສູງ, ກໍ່ສ້າງພື້ນຖານໂຄງລ່າງ, ຕົວເມືອງອັດສະລິຍະ, ອຸດສາຫະກຳ, ກະສິກຳເຕັກໂນໂລຢີສູງ, ພະລັງງານສະອາດ... ແລະບັນດາຂະແໜງ ອຸດສາຫະກຳທີ່ໄດ້ເລືອກເຟັ້ນໃນຍຸດທະສາດຫັນເປັນປະເທດອຸດສາຫະກຳຂອງຫວຽດນາມໃນຂອບເຂດຮ່ວມມືຫວຽດນາມ-ຍີ່ປຸ່ນ ມຸ່ງໄປເຖິງປີ 2020, ວິໄສທັດ 2030.

ນັກຂ່າວ: ຂໍຂອບໃຈທ່ານນາຍົກລັດຖະມົນຕີ !

ໂດຍ: ແສງຄຳ